Prokuroria Speciale e Kosovës, ka kërkuar 30 ditë paraburgim për Fatmir Shehollin, derisa autoritetet të kryejnë hetime ndaj tij nën dyshimin se ka qenë i përfshirë në spiunazh kundër shtetit. Analisti Sheholli u arrestua të enjten, pas disa muajsh hetime për të. Policia e Kosovës kreu bastisje në vendbanimin e Shehollit. Ministri i Brendshëm në detyrë, Xhelal Sveçla, tha të enjten, pas arrestimit, se Sheholli ka pasur “hapësira të pakufizuara” në mediat e Kosovës, dhe se ai ka “bashkëpunuar me aktorë që çdo ditë punojnë e veprojnë për të minuar Republikën e Kosovës dhe progresin e saj”. Ministri Sveçla la të nënkuptohej se Sheholli kishte spiunuar për Serbinë. Së fundmi, autoritetet në Kosovë kanë arrestuar, akuzuar e gjykuar serbë e shqiptarë nën dyshimet se po spiunonin për shërbimet e inteligjencës së Serbisë. Shtetasja serbe Jellena Gjukanoviqit, ishte rasti I fundit, e cila u akuzua për spiunazh për inteligjencën serbe. Ajo e ka mohuar fajësinë. Sipas Kodit Penal të Kosovës, spiunazhi konsiderohet krim i rëndë dhe dënohet me të paktën pesë vjet burgim, nëse i dyshuari shpallet fajtor.