Presidenti amerikan Donald Trump, njoftoi të martën vonë se do ta zgjasë në mënyrë të njëanshme armëpushimin me Iranin, por shtoi se bllokada e porteve iraniane, e cila ka zemëruar Teheranin, do të mbetet në fuqi. “Bazuar në faktin se Qeveria e Iranit është seriozisht e përçarë, gjë që nuk është e papritur, dhe me kërkesë të marshallit Asim Munir dhe kryeministrit të Pakistanit, Shehbaz Sharif, na është kërkuar ta pezullojmë sulmet ndaj Iranit deri në momentin kur udhëheqësit dhe përfaqësuesit e tyre të mund të dalin me një propozim të unifikuar”, shkroi Trump në Truth Social të martën vonë. Trump shtoi se do ta “zgjasë armëpushimin deri në momentin kur propozimi i tyre të dorëzohet dhe bisedimet të përfundojnë, në një mënyrë apo tjetër”. Ai nuk dha ndonjë afat të saktë kohor. Nuk është ende e qartë nëse Teherani do ta zgjasë armëpushimin nga ana e vet. Një këshilltar i kryetarit të fuqishëm të Parlamentit të Iranit e quajti zgjatjen e armëpushimit “një manovër për të fituar kohë për një sulm të befasishëm” dhe theksoi se Teherani duhet të marrë iniciativën, pa dhënë hollësi.