Katër persona janë arrestuar në flagrancë duke transportuar 35 emigrantë të paligjshëm. Autoritetet e policisë kufitare në zonën Korçës kanë evidentuar një automjet në afërsi të fshatit Burimas në Maliq, i cili ngrinte dyshimet për ushtrim aktiviteti të paligjshëm. Menjëherë uniformat blu i kanë bërë me shenjë drejtuesit të mjetit që të ndalonte. Mësohet se policia kufitare është hasur në fillim me rezistencën e katër shtetasve, por më pas situata është neutralizuar, me ndërhyrjen edhe të forcave speciale ‘Shqiponjat’. Si rezultat janë arrestuar katër shtetasit: Erjon Llapushi Tonin Hasa, Ergi Aliu, dhe Klorent Larti. Erjon Llapushi nuk është një emër i ri për autoritetet policore dhe drejtësinë shqiptare, kjo pasi ai ka qenë subjekt i OFL-së. Pas emrit të tij fshihet një grup i strukturuar kriminal, i cili kërcënonte përmes dhunës shtetas të ndryshëm duke i detyruar t’u jepnin pasurinë. Nga hetimet e mëparshme, Erjon Llapushi akuzohet si pjesë e një grupi të strukturuar kriminal që përmes shantazhit e dhunës ka detyruar biznesmenë të ndryshëm nga Pogradeci t’i dhurojnë aksione në kompanitë e tyre.