Një ngjarje tragjike është shënuar në fshatin Restelicë të Dragashit, ku një 30-vjeçar me inicialet F.B. ka vrarë nënën e tij. Sipas Prokurorisë Themelore të Prizrenit, dyshohet se 30-vjeçari ka ushtruar dhunë fizike ndaj nënës së tij brenda shtëpisë së tyre. Nga të dhënat, rezulton se i dyshuari ka pasur çrregullime mendore, si dhe ka qenë më herët i përfshirë në tri raste penale të dhunës në familje, të trajtuara nga Prokuroria e Prizrenit. Prokuroria ka njoftuar se një rast është trajtuar gjatë vitit 2024, ndërsa dy raste gjatë vitit 2021. Për këto raste, organi I akuzës ka ndërmarrë veprimet ligjore përkatëse, ka ngritur aktakuza dhe për të njëjtat raste janë nxjerrë aktgjykime dënuese. Autoritetet në Kosovë, njoftojnë se po ndërmerren të gjitha veprimet e nevojshme hetimore për zbardhjen e plotë të rrethanave dhe shkakut të vdekjes.