Ministrja e Drejtësisë, Etilda Gjonaj, ka zhvilluar një mbledhje urgjente me drejtorët e çdo burgu dhe Institucioni të ekzekutimit të vendimeve penale në Shqipëri. Kur na ndajnë vetëm tre javë nga procesi zgjedhor i 25 Prillit, Gjonaj ka dhënë porosi të prera për drejtuesit e burgjeve, me qëllim garantimin e sigurisë po edhe të së drejtës së votës për çdo të burgosur në vend. Thuajse të gjitha burgjet do të kenë qendër votimi. Nga ana e stafit të burgjeve, sidomos atij ligjor, Gjonaj kërkoi të merren masa që t’i jepet mundësia administratës zgjedhore të sigurojë mbarëvajtjen e procesit. Nga ana tjetër theksoi se është kategorikisht e ndaluar që forcat policore të burgjeve të angazhohen nëpër fushata elektorale dhe se në të kundërt do të merren masa drastike. Një nga porositë e tjera në mbledhje ishte se duhet të merren të gjitha masat që asnjë send i palejueshëm të futet në institucione, sidomos celularët dhe lëndët narkotike apo sende të tjera që mundet të sjellin një rrezik për pjesën e sigurisë në institucione. Sistemi 41 Bis, i cili garanton ngalimin e komunikimit të të burgosurve me persona të tjerë jashtë qelive, është cilësuar nga ministrja e Drejtësisë, si hapi më i suksesshëm i ndërmarrë në sistemin penitencial. Detyrën për monitorimin e zbatimit të këtij sistemi e ka drejtori i Policisë së Burgjeve dhe nga Shërbimi i Kontrollit të Brendshëm të Burgjeve. Në përfundim Gjonaj u ndal edhe tel procesi i vaksinimit të personelit shëndetsor në burgje, u cili do të ndiqet nga ai i forcave policore të sistemit.