Shiu i përvitshëm i meteorëve, Perseide, ka ndricuar qiejt nëpër botë duke mahnitur ata që shpresonin të shijonin një grimcë të atyre që njihen edhe si yjet që bien. Fenomeni sjell deri në 100 meteorë në një orë ndërsa toka përplaset me betjet që ka lënë pas kometa 109P/Sëift Tuttle. Ndërsa mbetjet godasin atmosferën e tokës, ato digjen duke rezultuar në fleshe të shndritshme që njihen si yje që bien, dhe mund të shihen me sy të lirë. Spektakli natyror ndodh në kohë të ngjashme në korrik dhe gusht të cdo viti dhe për këtë vit, kulmi ishte mes natës së të shtunës dhe orëve të para të së dielës. Meteorët, që mund të jenë të vegjël sa një kokërr rëre ose të mëdhenj sa një bizele, godasin atmosferën e tokës me shpejtësinë e 215 mijë kilometrave në orë. Mbetjet që përvëlohen në atmosferë, nuk përbëjnë asnjë rrezik për njerëzit në tokë. Ky konsiderohet një nga eventet më të mirë astronomikë pasi prodhon meteorë të shndritshëm dhe është një nga më aktivët. Këtë vit, NASA, që monitoron meteorët duke përdorur një rrjet kamerash, i pikasi meteorët e parë të perseideve më 26 korrik. Madje, një nga fotot që NASA sjell për të ilustruar spektaklin, është nga parku kombëtar i Shebenikut, në Shqipëri. Fenomeni, quhet shiu i meteorëve Perseidë, pasi meteorët duket se e kanë origjinën nga yjësia e perseut, që ka marrë emrin e një figure të mitologjisë greke.