Presidenti amerikan, Donald Trump, u shpreh më i rezervuar në lidhje me një takim të mundshëm mes Presidentit rus Vladimir Putin dhe Presidentit ukrainas Volodymyr Zelenski. "Nuk e di nëse ata do të takohen. Ndoshta do të takohen. Ndoshta jo", tha Trump në Uashington duke iu përgjigjur pyetjeve të gazetarëve. Trumpi u tha gazetarëve se pas takimit për Ukrainën në Shtëpinë e Bardhë kishte folur në telefon me Putinin dhe se çdo bisedë që ka pasur me të ka qenë "një bisedë e mirë". Ai megjithatë shprehu zemërimin e tij për sulmet ruse ndaj qyteteve ukrainase. Javën e kaluar, zëdhënësja e tij Karoline Leavitt, kishte deklaruar se Putini kishte rënë dakord për një takim të drejtpërdrejtë me Zelenskin gjatë javëve të ardhshme. Pas takimit Trump-Putin u fol shumë se një takim mes Putinit dhe Zelenskit mund të zhvillohet së shpejti, por që atëherë Kremlini i ka minimizuar këto pritshmëri. Ministri i Jashtëm Sergei Lavrov deklaroi së fundmi se Moska dhe Kievi duhet së pari të bien dakord për paqen dhe pastaj një takim midis presidentëve mund të vulosë marrëveshjen. Presidenti ukrainas Volodymyr Zelenski tha ndërkohë se në fund të javës do të zhvillojë bisedime me përfaqësuesit e SHBA-së në lidhje me negociatat e mundshme me Rusinë për t'i dhënë fund luftës. Ai u takua në Kiev me të dërguarin special të SHBA-së, Keith Kellogg, me të cilin diskutoi për sanksione të mundshme kundër Rusisë. Në një deklaratë online Zelenski tha se me Kellogg kishte folur për mënyrat se si "mund të detyrohet Moska që të hyjë në negociata të vërteta për t'i dhënë fund luftës". Zelenski tha se me të dërguarin special të SHBA-së Kellogg kishte diskutuar edhe për garancitë e sigurisë, në rast të një marrëveshjeje paqeje me Rusinë. Zelenski pret që aspektet më të rëndësishme të garancive për sigurinë të negociohen "së shpejti".