Rezistenca ndaj antibiotikëve po kthehet në një nga kërcënimet më serioze për shëndetin global. Organizata Botërore e Shëndetësisë paralajmëron se përhapja e baktereve dhe mikroorganizmave rezistentë ndaj ilaçeve mund ta bëjë gjithnjë e më të vështirë trajtimin e infeksioneve. Sipas OBSH-së, kjo situatë rrezikon edhe procedurat më të zakonshme mjekësore. Operacionet rutinë dhe lindjet e fëmijëve mund të kthehen në procese me rrezik të lartë për jetën, nëse infeksionet nuk mund të trajtohen më me antibiotikët që përdoren sot. Eksperti i organizatës, Jean-Pierre Niemazi, thotë se rezistenca antimikrobike, e njohur ndryshe si AMR, është tashmë e përhapur dhe kërcënon të ardhmen e mjekësisë moderne. Por rreziku nuk kufizohet vetëm te pacientët që kryejnë ndërhyrje kirurgjikale.