Disa imazhe te reja të presidentit amerikan Donald Trump, ku dora e tij shihet e mbuluar me grim dhe me shenja mavijosjeje, janë bërë virale në rrjetet sociale. Fotot e realizuara ditët e fundit në Zyrën Ovale kanë hapur diskutime për gjendjen shëndetësore të presidentit. Detaji u vu re edhe gjatë takimit me presidentin e Koresë së Jugut, Lee Jae Myung, kur në fotot zyrtare shfaqej një mavijosje e dukshme në dorën e djathtë. Ky fakt erdhi pas deklaratave të korrikut, kur Shtëpia e Bardhë njoftoi se Trump ishte diagnostikuar me insuficiencë kronike venoze, një gjendje e zakonshme që lidhet me qarkullimin e gjakut. Mjeku i Shtëpisë së Bardhë, Sean Barbabella, tha se shenjat janë të zakonshme, duke i lidhur ato me përdorimin e aspirines dhe shtrëngimet e shpeshta të duarve. Në raste të tjera, përfshirë vizitën e Emmanuel Macron në shkurt dhe takimin me Ursula von der Leyen në korrik, duart e Trump kanë qenë gjithashtu në qendër të vëmendjes.