Qeveria spanjolle të martën i përshkroi zjarret që kanë përfshirë vendin si një nga katastrofat më të këqija mjedisore në vite, ndërsa miratoi masa ndihme për zonat e prekura. Zjarret që shpërthyen në të gjithë Spanjën këtë muaj kanë shkatërruar mbi 350,000 hektarë si dhe kanë vrarë katër persona dhe kanë detyruar mijëra njerëz të evakuohen përkohësisht. "Është e qartë se po përballemi me një nga katastrofat më të mëdha mjedisore në vitet e fundit", tha Ministri i Brendshëm Fernando Grande-Marlaska në një konferencë për shtyp pas takimit javor të kabinetit. Kabineti i shpalli zonat e goditura nga zjarret si zonë fatkeqësie, një veprim që zhbllokon ndihmë të drejtpërdrejtë, lehtësime tatimore dhe ndihma të tjera për komunitetet e prekura. Të martën kishte 15 zjarre ende aktive në nivelin dy - që do të thotë se ato përbëjnë një kërcënim për njerëzit dhe pronën. Partia Popullore (PP) forca kryesore e opozitës ka akuzuar administratën e kryeministrit socialist Pedro Sanchez për vonesë në mbështetjen e qeverive rajonale, të cilat janë përgjegjëse për reagimin ndaj katastrofave. Zonat më të goditura -- Castile dhe Leon, Extremadura dhe Galicia në veri dhe perëndim -- qeverisen nga Partia Popullore. Kreu i PP-së, Alberto Nunez Feijoo, akuzoi të hënën qeverinë për planifikim të dobët dhe propozoi një plan 50-pikësh që përfshinte krijimin e një regjistri kombëtar të zjarrvënësve.