Zyrtarët e qeverisë amerikane dhe ruse diskutuan disa marrëveshje energjetike në margjinat e negociatave të këtij muaji që synonin arritjen e paqes në Ukrainë, sipas pesë burimeve të njohura me bisedimet. Këto marrëveshje u paraqitën si stimuj për të inkurajuar Kremlinin të bjerë dakord për paqen në Ukrainë dhe që Uashingtoni të lehtësojë sanksionet ndaj Rusisë, thanë ata. Rusia është përjashtuar nga shumica e investimeve ndërkombëtare në sektorin e saj të energjisë dhe nga lidhja e marrëveshjeve të mëdha për shkak të sanksioneve pas pushtimit të Ukrainës që filloi në shkurt 2022. Zyrtarët diskutuan mundësinë që Exxon Mobajl të rikthehet në projektin rus të naftës dhe gazit Sakhalin-1. Ata gjithashtu ngritën mundësinë e Rusisë për blerjen e pajisjeve amerikane për projektet e saj të LNG-së, siç është Arctic LNG 2, që është nën sanksione perëndimore, thanë katër burime.