Irani ka akuzuar Shtetet e Bashkuara për shkelje të rëndë të armëpushimit, pas sulmeve të reja ajrore që sipas Teheranit janë kryer në territorin iranian gjatë 48 orëve të fundit. Nga ana tjetër, Komanda Qendrore e SHBA-së ka konfirmuar se në Iranin jugor janë goditur vende të lëshimit të raketave dhe mjete detare që dyshohet se po vendosnin mina, duke i cilësuar sulmet si “veprime vetëmbrojtëse”. Ministria e Jashtme e Iranit ka reaguar duke e konsideruar këtë një akt agresioni të pajustifikuar, për të cilin mban përgjegjëse SHBA-në, veçanërisht në rajonin pranë Ngushticës së Hormuzit, një nga korridoret më të rëndësishme të transportit të naftës në botë. Sipas autoriteteve iraniane, çdo përshkallëzim do të marrë përgjigje, ndërsa Teherani thekson se nuk do të hezitojë të mbrojë vendin.