Projektligji për njohjen e Washington DC si shtet, më në fund mori formë, pas përpjekjes disa dekadëshe për riformatimin e hartave politike amerikane. Dhoma e Përfaqësuesve ka miratuar legjislacionin që do të krijonte shtetin e 51, duke i dhënë mundësinë Uashington DC-së të ketë një përfaqësues dhe dy senatorë në Kongres. Propozimi është përballuar me një betejë të ashpër në Senat, ku kontrolli i ngushtë i demokratëve ishte i mjaftueshëm për të kapërcyer kundërshtimin e fortë të republikanëve. Deklarata e Shtëpisë së Bardhë e vlerëson Uashingtonin si të denjë për të qënë shtet, me "një ekonomi të fuqishme, një kulturë të pasur dhe një popullsi të larmishme amerikane nga të gjitha sferat e jetës që kanë të drejtë për pjesëmarrje të plotë dhe të barabartë në demokracinë tonë". Një copë toke, që përfshin Shtëpinë e Bardhë, Kapitolin dhe Shëtitoren Kombëtare do të mbetej sipas projekt-ligjit, distrikt federal. Në vend të Distriktit të Kolumbias, shteti i ri do të njihej me emrin Uashington, Komonuelthi Daglas – për nder të luftëtarit të famshëm kundër skllavërisë, Frederick Douglass. Një projekt-ligj i ngjashëm për shtetësinë e Uashington DC-së u miratua në vitin 2020 në Dhomën e Përfaqësuesve, por u hodh poshtë në Senatin e kontrolluar nga republikanët në atë kohë. Gjatë një seance dëgjimore në mars në Komisionin e Mbikëqyrjes së Dhomës së Përfaqësuesve, një sërë ligjvënësish republikanë thanë se që DC-ja nuk i plotëson kushtet për shtetësinë ndërsa e quajtën përpjekjen një lojë cinike të pushtetit nga ana e demokratëve. Ata thonë se DC-ja është një rast i veçantë që kërkon hapa të veçantë.