I dërguari i posaçëm i Departamentit amerikan të Energjisë për integrimin energjetik, Joshua Volz, deklaroi se Shtetet e Bashkuara po rrisin angazhimin në Ballkanin Perëndimor, me synim forcimin e sigurisë energjetike dhe uljen e varësisë së rajonit nga gazi rus. Në sajë të kësaj qasjeje, duke folur për Kosovën, zyrtari amerikan e cilëson atë si aleate shumë të rëndësishme dhe vend me nevojë urgjente për modernizim të sistemit energjetik. Sipas tij, vendi paraqet potencial për investime amerikane dhe për rritje të prodhimit dhe efikasitetit energjetik. Volz shtoi se synimi është që Kosova të lidhet, drejtpërdrejt ose tërthorazi, me rrjetet rajonale të gazit, përmes korridoreve që kalojnë nga Greqia, Kroacia dhe Bosnje e Hercegovina. Ai nënvizoi se këto rrugë do të mundësonin ardhjen e gazit natyror amerikan në Kosovë. Sipas tij, përfshirja në këto projekte varet nga përmirësimi i kushteve të tregut dhe krijimi i një mjedisi më tërheqës për investime, ndërsa SHBA-ja shpreh gatishmëri për të mbështetur bashkëpunimin mes kompanive amerikane dhe partnerëve në Kosovë.