Banka e Shqipërisë u është rikthyer rritjes së normave të interesit duke deklaruar se reduktimi i inflacioni ka qenë mbi nivelet e parashikuara nga ekspertët e saj. Vendimi i Bordit Mbikëqyrës të Bankës u komunikua nga Guvernatori Gent Sejko këtë të enjte. Sipas këtij vendimi, norma bazë rritet nga 2.75 për qind që është aktualisht në 3 për qind. Të parët që do të ndjejnë efektet e kësaj rritjeje janë individët dhe bizneset që kanë kredi në lek, të cilëve do t’u shtrenjtohet kësti. Në mënyrë indirekte, rritja ndikon edhe te interesat e borxhit publik të qeverisë.