Gjatë dy dekadave të fundit, asnjë kompani nuk ka bërë më shumë për të formësuar vendet e punës në Amerikë sesa Amazon. Në ngjitjen e saj për t'u bërë punëdhënësi i dytë më i madh në SHBA, ajo ka punësuar qindra mijëra punëtorë magazinash, ka ndërtuar një ushtri shoferësh dhe ka qenë pioniere në përdorimin e teknologjisë për të punësuar, monitoruar dhe menaxhuar punonjësit. Tani, intervistat dhe një sërë dokumentesh të strategjisë së brendshme të shikuara nga The Neë York Times zbulojnë se drejtuesit e Amazon besojnë se kompania është në prag të ndryshimit të saj të madh për sa i takon vendeve të punës: zëvendësimin e më shumë se gjysmë milioni vendesh pune me robotë. Forca punëtore e Amazon në SHBA është më shumë se trefishuar që nga viti 2018 në gati 1.2 milion. Por ekipi i automatizimit të Amazon pret që kompania të mund të shmangë punësimin e më shumë se 160,000 njerëzve në Shtetet e Bashkuara. Kjo do të kursente rreth 30 cent për çdo artikull që Amazon zgjedh, paketon dhe u dorëzon klientëve. Vitin e kaluar, drejtuesit i thanë bordit të Amazon se shpresonin që automatizimi robotik do t'i lejonte kompanisë të vazhdonte të shmangte shtimin e forcës së saj punëtore në SHBA në vitet e ardhshme, edhe pse ata presin të shesin dyfishin e produkteve deri në vitin 2033. Kjo do të përkthehej në më shumë se 600,000 punëtorë për të cilët Amazon nuk do të kishte më nevojë. Dokumentet tregojnë se ekipi i robotikës së Amazon ka një qëllim përfundimtar për të automatizuar 75 përqind të operacioneve të saj. Amazon është aq e bindur se kjo e ardhme e automatizuar është afër saqë ka filluar të hartojë plane për të zbutur pasojat në komunitetet që do të preken nga humbja e vendeve të punës.