Regjistrimet audio mes makinistëve dhe qendrës së kontrollit në Madrid kanë ngritur dyshime mbi komunikimin dhe autorizimet e dhëna pak minuta para aksidentit të rëndë hekurudhor në Spanjë, ku humbën jetën 69 persona. Sipas regjistrimeve të publikuara nga mediat spanjolle, një treni me shpejtësi të lartë duket se iu dha leja për të lëvizur, ndërsa rreth 25 kilometra më përpara një tren tjetër kishte mbetur i bllokuar në shina. Bisedat mes qendrës së kontrollit dhe dy makinistëve janë bërë pjesë kyçe e hetimeve për zbardhjen e rrethanave të ngjarjes. Autoritetet po analizojnë komunikimet për të përcaktuar nëse pati gabime në koordinim apo në dhënien e autorizimeve për lëvizjen e trenave. Megjithatë, regjistrimet nuk përbëjnë ende një përfundim zyrtar mbi shkakun e aksidentit. Tragjedia ndodhi të mërkurën në mëngjes, kur një tren që udhëtonte nga Madridi drejt Seviljes u përplas me një tren të ndaluar. Përveç 69 viktimave, dhjetëra persona mbetën të plagosur. Kryeministri spanjoll, Pedro Sánchez, është zotuar se hetimi do të zbardhë çdo detaj të aksidentit. Ndërkohë, Spanja ka shpallur tri ditë zie kombëtare në nderim të viktimave.