Presidentja e Bankës Qendrore Evropiane, Christine Lagarde, njoftoi dorëheqjen e saj të enjten, duke i dhënë fund muajve të spekulimeve rreth së ardhmes së saj në një moment delikat për Evropën dhe BQE-në. Lagarde do të largohet nga detyra më 7 shkurt, duke u dhënë kohë liderëve aktualë të Bashkimit Evropian për të zgjedhur një pasardhës, shumë kohë para zgjedhjeve presidenciale në Francë, ku, sipas sondazheve, kandidatja e së djathtës ekstreme, Marine Le Pen, është favoritja për të fituar. "Presidentja e Bankës Qendrore Evropiane, Christine Lagarde, njoftoi sot Këshillin Drejtues dhe Presidentin e Këshillit Evropian, António Costa, se do të largohet nga posti i saj më 7 shkurt 2027," thuhet në një njoftim për shtyp të BQE-së. Ish-guvernatorët e bankave qendrore të Holandës dhe Spanjës, Klaas Knot dhe Pablo Hernandez de Cos, shihen si kandidatët kryesorë për të zëvendësuar Lagarde-in. Mandati i Lagarde ishte planifikuar të zgjaste deri në fund të tetorit 2027, por spekulimet për një largim të parakohshëm ishin shtuar prej muajsh, ndërsa Forumi Ekonomik Botëror përmendej si një destinacion i mundshëm për të.