Një sasi tritoli ka shpërthyer në orët e para të mëngjesit të së hënës në një dyqan në lagjen “Skënder Libohova’ në lushnje, në pronësi të Arjan Aliços, i njohur si pjesëtar i bandës së Lushnjes, drejtuar në vitet e saj të errëta nga Aldo Bare. Sasia e lëndës plasëse ka qenë e vogël, për pasojë ka mbetur i dëmtuar vetëm qepeni i ambientit. Kjo është hera e dytë që goditet banesa e Aliços. Në janar të vitit 2018 persona të pa identifikuar kanë qëlluar me breshëri plumbash në drejtim të banesës së Aliços ku plumbat arritën deri në brendesi por fatmirësisht pa dëmtuar njeri. Arjan Aliço ndodhet i arrestuar që prej vitit 2016, pasi së bashku me të birin Xhino Aliço kanë tenuar të vrasin një shtetas, duke e lënë të plagosur nga goditjet e thikës. Ngjarja ndodhi pas një konflikti për motive të dobëta, në një pikë bastesh. Arjan Aliço u arrestua menjëherë pas ngjarjes, ndërsa i biri mundi të largohej dhe t’i fshihej policisë deri pak kohë më parë. Xhino Aliço u shpall në kërkim ndërkombëtar dhe u arrestua nga autoritetet policiore në Kroaci. Pak ditë më parë ai u ekstradua nga Kroacia për llogari të Interpol Tiranës pasi rezulton i dënuar me 13.6 vite burg për tentativë vrasje. Prej vitit 2018 në banesën e Aliços nuk banonte njeri pasi familjarët ishin larguar.