Rrugë të bllokuara nga gurët dhe vërshim uji në akset kryesore të qytetit. Është kjo panorama që të ofron Elbasani paraditen e kësaj të shtune, ku ashtu sikurse pjesa më e madhe e qyteteve të Shqipërisë, edhe Elbasani është zgjuar me reshje të dendura shiu. Situata paraqitet më problematike në aksin Librazhd – Elbasan ku ka prani gurësh në rrugë. Ndërkohë rrugët e qytetit janë përmbytur nga shirat e vrullshëm që përfshinë vendin. Në Gjocaj të Peqinit dhe Gracen të Elbasanit energjia elektike u ndërpre, si pasojë e dëmtimeve në linjën e furnizimit me energji elektrike. Ekipet e emergjencave zbarkuan në terren për t’u ardhur në ndihmë qytetarëve, ku do të qëndrojnë në gatishmëri në rast të përkeqësimit të situatës. Edhe në Fier situata paraqitet e rënduar. Uji ka vërshuar në akset kryesore të qytetit, duke vështirësuar qarkullimin e automjeteve dhe qytetarëve. Sasia e reshjeve të shënuara këtë të shtunë, llogaritet ndër më të lartat gjatë viteve të fundit teksa strukturat përgjegjëse dhe kontraktorët po punojnë për të normalizuar situatën.