Ndërsa pluhuri po shpërndahet në Moskë pas raportimeve se krahu i djathtë i Vladimir Putinit ka humbur mbështetjen, dikush mund t’ia ketë vënë tashmë syrin vendit të tij në tryezën e lartë të Kremlinit. Ministri veteran i jashtëm rus Sergei Lavrov thuhet se u pezullua nga takimet e nivelit të lartë, duke shkaktuar spekulime nëse ai është shkarkuar. Kremlini të premten u detyrua të hidhte poshtë spekulimet se Lavrov kishte humbur mbështetjen e Putinit pas dështimit të takimit të Budapestit me presidentin amerikan Donald Trump. Por burime të larta nga Moska pretendojnë se vajza e dytë e Putinit, Katerina Tikhonova, 39 vjeç, po kërkon ta rrëzojë Lavrovin për të zënë vendin e tij, në Kremlin. Ish-shkruesi i fjalimeve të Putinit, Abbas Gallyamov, tha se "burime serioze" i thanë atij se Katerina po kërkonte të fundoste Lavrovin, ndërsa rrethi i saj politik manovron për të mbyllur luftën. Ai tha se thashethemet rreth Lavrovit qarkullonin që prej gjashtë muajsh. Lavrov është diplomati i vijës së ashpër i Rusisë, dhe ka fituar nofkën “Dr. Jo” për pengesat e tij dhe refuzimin për të bërë kompromis me Perëndimin. Ai ka qenë në krye të marrëdhënieve të jashtme të Rusisë prej 21 vjetësh. Megjithatë, aleati kryesor i Putinit mungoi në tryezë kur Këshilli i Sigurisë së Rusisë njoftoi se Moska mund të rifillojë testimin e armëve bërthamore, javën e kaluar. Takimi ishte një moment i rëndësishëm për Putinin, i parë si një përgjigje ndaj kërcënimeve bërthamore të Presidentit Donald Trump.