Presidenti Vladimir Putin i ka dyfishuar kërkesat e tij kryesore për t'i dhënë fund luftës në Ukrainë, duke deklaruar se Rusia do të lëshojë armët vetëm nëse trupat e Kievit tërhiqen nga territori i pretenduar nga Moska. Putini ka kohë që kërkon njohjen ligjore të territoreve ukrainase që Rusia i ka pushtuar me forcë. Ato përfshijnë gadishullin e Krimesë, të cilin e aneksoi ilegalisht në vitin 2014, dhe Donbasin, të përbërë nga Luhansku dhe Donetsku, pjesën më të madhe të të cilit Moska tani e ka të pushtuar. Për Kievin, i cili ka përjashtuar heqjen dorë nga pjesët e Donbasit që ende mban, shpërblimi i Rusisë për agresionin e saj është një gjë e papranueshme. Duke folur me gazetarët gjatë një udhëtimi në Kirgistan, Putin akuzoi Kievin se dëshiron të luftojë “deri në ukrainasin e fundit” – gjë që ai tha se Rusia ishte gjithashtu e gatshme ta bënte. Ai përsëriti pikëpamjen e tij se Rusia ka iniciativën në fushën e betejës dhe luftimet do të mbarojnë vetëm kur trupat ukrainase të tërhiqen nga territoret e sulmuara. "Nëse ata nuk tërhiqen, ne do ta arrijmë këtë me forcën e armëve", tha ai. Deklaratat e Pitunit vijnë pak ditë pas prezantimit të planit të paqes nga ana e SHBA dhe diskutimee që po zhvillohen mes palëve.