Autoritetet e sigurisë kanë urdhëruar evakuimin e plotë të ndërtesës së Kuvendit të Kosovës pas një kërcënimi me bombë, duke shkaktuar shtyrjen e seancës konstituive për në orët e mbrëmjes. Policia ka njoftuar se rasti është paraqitur në prokurori, ndërsa njësitë përkatëse dhe ekspertët e deminimit po kryejnë kontrollin e plotë të objektit dhe ambientit përreth. Zëvendësi i sekretarit të Përgjithshëm të Kuvendit, Arben Loshi bëri të ditur se evakuimi është kërkuar nga policia, pasi një telefonatë në gjuhën angleze paralajmëroi se një bombë brenda ndërtesës do të shpërthente për dhjetë minuta. Si pasojë e këtij alarmi, seanca që ishte paraparë të fillonte në orën 11:00 do të mbahet sonte në orën 20:00. Sipas Loshit, skuadra anti-bombë e ka përfunduar kontrollin në të gjitha hapësirat e ndërtesës. Deputeti i Lëvizjes Vetëvendosje, Glauk Konjufca, e quajti ngjarjen një “kërcënim të qartë”, që po trajtohet me seriozitet edhe nga policia. Kuvendi i Kosovës ishte mbledhur këtë të shtunë për herë të 42-të që nga 15 prilli për të zhvilluar seancën konstituive.