Ndërsa dronët kamikazë amerikanë të udhëhequr nga rrjeti Starlink i Elon Musk filluan të shënonin fitore të dukshme në luftën kundër Iranit, zyrtarë të lartë të SpaceX dolën në një përfundim: Pentagoni duhet të paguajë më shumë për akses në rrjetin e tyre satelitor Ëi-Fi. Brenda disa javësh nga nisja e fushatës së bombardimeve nga Shtetet e Bashkuara, drejtuesit e SpaceX u takuan me zyrtarë të Pentagonit dhe argumentuan se ushtria kishte paguar rreth 5,000 dollarë për lidhje me terminalet, ndërsa në mënyrë efektive përdorte një nivel më të lartë shërbimi me vlerë afër 25,000 dollarëve. Mosmarrëveshja mbi përdorimin e Starlink në dronët kamikazë LUCAS, një model i lirë amerikan i krahasueshëm me Shahedët e Iranit që mund të fluturojë mbi një zonë të synuar përpara se të zhytet për të shpërthyer në momentin e impaktit, është pjesë e tensioneve në rritje mes SpaceX dhe Pentagonit mbi çmimet e Starlink në muajt e fundit, shkruan Reuters. Pentagoni, i cili po kërkon të ndihmojë qytetarët iranianë të anashkalojnë ndërprerjet e komunikimit të imponuara nga qeveria, ka qenë gjithashtu në mosmarrëveshje me SpaceX mbi çmimet e një plani për t'i ofruar popullsisë lidhje direkte me celular, me Starlink, të ngjashme me shërbimin 5G, thanë dy burime.