Ndihmëssekretari amerikan i Shtetit për Evropën dhe Euroazinë, James O'Brien, në një dalje për mediat serbe ka kërkuar që të gjitha marrëveshjet e arritura në dialogun për normalizim të raporteve mes Kosovës dhe Serbisë të respektohen. Sa i përket Asociacionit të komunave me shumicë serbe, O’Brien tha se është e rëndësishme që të respektohen marrëveshje, dhe se për këtë duhet që në Gjykatën Kushtetuese të Kosovës të kalojë një draft-statut për Asociacionin. Teksa u ndal edhe te integrimi i serbëve në Kosovë, O’Brien tha se “Asociacioni është një hap i rëndësishëm. Është e rëndësishme të shënohet përparim edhe para formimit të Asociacionit. Është e rëndësishme që njerëzit të jetojnë normalisht, të regjistrohen martesat, fëmijët që lindin dhe në të gjitha këto të punojmë njëkohësisht. Obligimet ekzistojnë që nga viti 2015. Nuk mund t’iu ofroj një afat kohor, por më e rëndësishmja është që serbët të jetojnë sikurse qytetarët evropianë”, tha O’Brien.