Kryeministri i Kosovës, Albin Kurti ka deklaruar se Bekim Sejdiu mbetet kandidati konsensual për president dhe se për LVV qëndron ende marrëveshja me LDK-në pavarësisht tërheqjes së tij nga gara. “Nga pikëpamja e LVV-së, ne kemi marrëveshje politike dhe duhet të respektojmë atë. Nuk kemi emër të ri ose tjetër. Nëse do të jetë rasti për të ardhmen, natyrisht se do të njoftoheni” Kryeministri Kurti, është shprehur optimist për arritjen e një marrëveshjeje politike për zgjedhjen e presidentit. Ai është shprehur se në ditët në vijim do të ketë takime me kryetarin e PDK-së, Bedri Hamza, dhe kryetarin e LDK-së, Lumir Abdixhiku, për këtë çështje. “Duhet të ketë takime, diskutime dhe pajtime. E kam parë se është e mundshme, ekziston rruga që mund të ecim bashkë. Me 99 vota për në deklaratën e së hënës janë një dëshmi e qartë për këtë. Nuk besoj se këto diskutime duhet të bëhen në media, por në mes krerëve të partive, në biseda të brendshme dhe pastaj të publikohen rezultatet e këtyre takimeve. Unë jam optimist sepse e kam parë se është e mundshme. Përveç që kemi vullnet, kemi edhe mundësi, e kur ekziston vullneti dhe mundësia, është mëkat të mungojë suksesi”