Fillon zyrtarisht fushata për zgjedhjet e parakohshme për Kuvendin e Kosovës, të cilat do të mbahen më 7 qershor. Gjatë 10 ditëve të ardhshme 21 subjekte politike do të zhvillojnë aktivitetet e tyre zgjedhore në të gjithë vendin. Zëdhënësi i KQZ-së, Valmir Elezi, shprehet për KosovaPress se sipas Ligjit për Zgjedhjet e Përgjithshme, fushata përfundon me hapjen e qendrave të votimit në ditën e zgjedhjeve. “Për 10 ditë të qershorit në vazhdim, 21 subjektet politike, me gjithsej 902 kandidatë për deputetë, do të mund të zhvillojnë aktivitetet e tyre në kuadër të fushatës zgjedhore për zgjedhjet e parakohshme për Kuvendin e Kosovës, të cilat do të mbahen më datë 7 qershor. Sipas Ligjit për Zgjedhjet e Përgjithshme, i miratuar në vitin 2023, fushata zgjedhore për subjektet politike dhe kandidatët e tyre përfundon me hapjen e qendrave të votimit në ditën e zgjedhjeve, pra në orën 7:00 të mëngjesit të datës 7 qershor. Pra, ashtu si në zgjedhjet e kaluara parlamentare dhe lokale, dita e shtunë nuk është heshtje zgjedhore”