Më shumë se nëntë mijë studentë janë regjistruar në dy fazat e para të raundit të parë në universitetet private dhe publike të vendit. Në total janë shtatë faza 48 orësh në raundin e parë, i cili përfundon më 13 shtator, por tashmë vihet re trendi i degëve më të preferuara nga maturantët. Në degët ku u zhvilluan konkurse si mjekësia dhe arkitektura, kuotat u ezauruan brenda dy ditëve, madje sipas të dhënave 436 kuotat e fakultetit të mjekësisë u mbyllën brenda 24 orëve. Studentët që fituan kuotat në universitetin e mjekësisë, janë edhe ata me mesatare më të lartë dhe që në shumicën e rasteve kanë rezultuar fitues në të dhjetë degët e zgjedhura prej tyre në aplikimin fillestar. Në sistemin U Albania maturantët ekselentë nga dhjetë degët e fituara do të zgjedhin vetëm një, duke hapur kuotat për studentët e tjerë të cilët do të shohin në sistem gradualisht që t’ju shfaqet ngjyra e verdhë e cila sinjalizon që se janë fitues në fazën vijuese. Në fakultetin e Ekonomisë, nga 1200 kuota total në të gjitha degët kanë mbetur më shumë se 250 kuota të lira. Faza e parë në shtatë raundet e saj, mbyllet më 13 shtator. Në datat 14-15 shtator, maturantët kanë të drejtë të çregjistrohen. Në periudhën 19–21 shtator 2024, do të kryhet procesi i aplikimit online për raundin e dytë në Portalin UAlbania. Ky raund ka pesë faza, dhe përfundon më 7 tetor.