Komisionarja evropiane për Zgjerim, Marta Kos do të ndalet në Kosovë javës tjetër, duke zhvilluar kështu vizitën e parë zyrtare që nga marrja e detyrës. Burime jozyrtare në Bruksel thanë për Radio Evropa e Lirë se vizita do të zhvillohet të premten e 15 Majit ndërsa pritet të konfirmohet zyrtarisht në ditët në vijim. Marta Kos mori detyrën e Komisioneres për Zgjerim në Komisionin Evropian më 1 dhjetor 2024. Ajo kishte planifikuar të ndalej më 12 Mars të këtij viti në Prishtinë por viizta u anulua pasi ish-presidentja Vjosa Osmani shpërndau Kuvendin. Ndërkohë gjatë vitit 2025, mungesën e vizitës së saj në Kosovë, Brukseli e argumentoi me mosfunksionimin e institucioneve në vend, për shkak të krizës politike. Megjithatë, sipas burimeve në Bruksel, shkruan Radio Evropa e Lirë, tani vlerësohet se vizita duhet të realizohet pavarësisht situatës politike, pasi nuk pritet që gjendja në Kosovë të ndryshojë thelbësisht në një periudhë të shkurtër. Në fund të prillit, Kos deklaroi në Parlamentin Evropian se pret të vizitojë së shpejti Kosovën për të diskutuar reformat që lidhen me Planin e Rritjes së Bashkimit Evropian për Ballkanin Perëndimor. “Kemi hequr masat dhe presim që Qeveria të vazhdojë me reformat e nevojshme për të përfituar nga mbështetja e BE-së. Së shpejti do të qëndroj në Prishtinë për ta çuar përpara këtë çështje”, kishte deklaruar ajo. Kosova më 16 prill mori 61.8 milionë euro parafinancim nga Bashkimi Evropian në kuadër të Planit të Rritjes, pasi ratifikoi marrëveshjet përkatëse dhe dorëzoi dokumentacionin e nevojshëm në Komisionin Evropian. Pakoja e BE-së për Ballkanin Perëndimor për periudhën 2024-2027 është në vlerë prej 6 miliardë eurosh. Sipas ndarjeve buxhetore, Kosovës i takojnë rreth 882 milionë euro, prej tyre 253 milionë euro grante dhe 629 milionë euro kredi. Ndërkohë pesë shtete të BE Greqia, Spanja, Rumania, Sllovakia dhe Qiproja ende nuk e njohin pavarësinë e Kosovës, gjë që konsiderohet pengesë për avancimin e Kosovës në rrugën drejt integrimit evropian.