Eurostar tha të mërkurën se do të përdorë trena me dy kate përmes Tunelit që përshkon Kanalin Anglez për herë të parë, pasi po përballet me konkurrencë të mundshme në rrugën e saj mes Londrës dhe Evropës kontinentale. Një investim prej 2 miliardë eurosh për rreth 50 trena elektrikë me dy kate të ndërtuar nga grupi francez Alstom mund ta ndihmojë Eurostar të arrijë shifrën e 30 milionë pasagjerëve në vit deri në dekadën e ardhshme, rreth 50 përqind më shumë se numri aktual i udhëtarëve. Kjo vjen ndërsa operatorë të tjerë evropianë po synojnë rrugën nënujore që lidh Anglinë me Francën, çka mund të thyejë monopolin tre-dekadësh të Eurostarit në shërbimet e pasagjerëve. Trenitalia e Italisë, Virgin e Mbretërisë së Bashkuar, Evolyn e Spanjës dhe startup-i holandez Heuro kanë treguar të gjitha interes. Trenat e rinj, që do të zëvendësojnë pjesën më të madhe të flotës aktuale të Eurostar, do të hyjnë në shërbim në vitin 2031, ndërsa kompania synon të fillojë linjat Londër-Gjenevë dhe Londër-Frankfurt. Kjo do t'i shtojë shërbimet e kompanisë mes kryeqytetit britanik dhe Francës, Belgjikës, Gjermanisë dhe Holandës. Linja Londër-Paris, që transporton tetë milionë pasagjerë çdo vit, synon të arrijë në 10 milionë pasagjerë deri në vitin 2030.