Në moshën 16-vjeçare, Labinot Dezdari iu bashkua Ushtrisë Çlirimtare të Kosovës, duke u bërë pjesë e brigadës 135 “Agim Zeneli”, në Rrafshin e Dukagjinit. Ashtu si shumë të rinj të asaj kohe, ai u bë pjesë e luftës me qëllimin clirimin e vendit. Labinoti nga Peja, pas përfundimit të luftës u angazhua në Trupat e Mbrojtjes së Kosovës për nëntë vjet si oficer për komunikim dhe informatikë. Pas dorëheqjes, prej 17 vitesh punon në Komunën e Pejës si udhëheqës i sektorit për teknologji dhe komunikim. Asnjëherë ai nuk arriti të përfitojë nga shteti pensionin e veteranit të luftës, për çka flet me zhgënjim për institucionet. Dezdari: Fyerje për sakrificën tonë, mohim i të drejtës ligjore “Sot nuk është e mira materiale apo diçka e ngjashme, por është problemi te mohimi i të drejtës ligjore. Është një fyerje për sakrificën tonë dhe për gjakun për këtë vend. Unë kërkoj nga opinioni publik, nga qeveria që të reflektojë sepse kjo nuk është vetëm ndaj nesh si veteran por për vet vlerat mbi të cilat është ndërtuar ky shtet. Është shumë e vështirë të diskutojmë tani për këtë çështje pas 27 viteve. Sepse diskriminimin as që e kemi menduar ndonjëherë.... Përkundër ankesave të tij dhe të shumë bashkëluftëtarëve të tjerë, Dezdari thotë se asnjë prej tyre nuk është marrë parasysh nga institucionet.