Kryetari i Aleancës për Ardhmërinë e Kosovës, Ramush Haradinaj ka reaguar pas rinumërimit të pjesshëm të votave të kandidatëve, duke theksuar se ky proces ka nxjerrë në pah një skemë manipulimi me përmasa shqetësuese ndaj votës së qytetarëve. Haradinaj ka bërë thirrje që votat të rinumërohen një për një, duke theksuar se pa një rinumërim të plotë, integriteti i zgjedhjeve të 28 Dhjetorit nuk mund të sigurohet. Ai gjithashtu ka kritikuar mungesën e veprimeve nga Prokuroria dhe i ka kërkuar të gjithë mekanizmave relevantë që me vendimet dhe veprimet e tyre të mbrojnë votën e qytetarit dhe të rikthejnë integritetin e procesit zgjedhor. Haradinaj paralajmëron se çdo drejtim tjetër mund të ketë pasoja të pariparueshme për demokracinë. Ndërsa partia demokratike e kosovës thotë se çdo e dhënë për cenim ose manipulim të votës është e papranueshme, pasi vota e qytetarëve është e shenjtë dhe çdo trajtim jokorrekt shkel parimet demokratike që partia mbështet dhe mbron. “Standardi ynë është i qartë: çdo votë duhet të trajtohet me të njëjtin respekt dhe kujdes, nga momenti i hedhjes deri në certifikimin përfundimtar të rezultateve. Eliminimi i çdo dyshimi është në interes të kandidatëve, institucioneve dhe qytetarëve”, thuhet në njoftimin e PDK-së.