Lideri historik i PS-së, ish-kryeministri Fatos Nano, duket se ka patur probleme shëndetësore. Ai është parë këtë fundjave teksa ka shkuar për një vizitë pranë një spitali privat në Tiranë, ku ka marrë ndihmë mjekësore. Mediat kanë publikuar pamjet e momentit kur ish-kryeministri që ka vendosur një maskë mbrojtëse kundër covid 19, zbret nga makina dhe futet me karrocë brenda ambienteve të spitalit. Ende nuk dihet për shqetësimet konkrete të ish-kryeministrit, nëse është prekur nga koronavirusi, apo nga ndonjë sëmundje tjetër. Ai është parë që në këtë vizitë në spital shoqërohej nga bashkëshortja e tij Xhoana Nano. Fatos Nano, 68 vjeç, ka qenë 3 herë kryeministër i Shqipërisë, ndërsa u shkëput nga politika në vitin 2005, kur Partia Socialiste humbi zgjedhjet parlamentare pas 8 vitesh qeverisjeje dhe kaloi në opozitë.