Dy vrasje kanë tronditur Kosovën brenda pak orëve mbrëmjen e së mërkurës. Vrasja e par ndodhi në lagjen Bregu i Diellit në Prishtinë, ku policia njofton se rreth orës 20:30 minuta ka marrë informacion për të shtëna me armë zjarri në rrugën Sali Nivica. Policia dhe ekipet e emergjencës mjekësore kanë mbërritur në vendin e ngjarjes, ku kanë konstatuar vdekjen e një personi. Hetimet në lidhje me dinamikën e ngjarjes vijojnë, teksa autori i dyshuar është identifikuar, por është në arrati. Vrasja e dytë ka ndodhur në Mitrovicë të Jugut, ku një 37 vjeçar ka gjetur vdekjen pasi është goditur me thikë. Policia thotë se ngjarja ka ndodhur në Lagjen e Romëve, ku 37 vjeçari është goditur me mjet prerës në qafë. I plagosur në këtë konflikt ka mbetur edhe vëllai i tij. Prokuroria Themelore e Mitrovicës po heton rastin, teksa paraprakisht dyshohet se vrasja ka ndodhur pas një konflikti të çastit për motive banale.