Guvernatori I Nju Jorkut, Andrew Cuomo dha dorëheqjen pasi një hetim zbuloi se kishte ngacmuar seksualisht disa gra, duke i dhënë nismë përpjekjeve për shkarkimin e tij. “Mënyra më e mirë se si mund të ndihmoj tani, është të largohem”, sqaroi ai në deklaratën e tij. Por ashtu siç ka bërë edhe më parë, Cuomo i mohoi sërish akuzat për abuzime duke i cilësuar si të motivuara politikisht. “Raporti i prokurores së përgjithshme thotë se unë kam ngacmuar seksualisht 11 gra. Reagimi ishte i stuhishëm. ashtu duhej të ndodhte, por pretendimet janë te rreme. Mendoj se nuk e kam kaluar limitin me askënd”, deklaroi vetë guvernatori. Cuomo po përballej me trysni në rritje për t’u dorëhequr nga radhët e tij demokrate, përfshirë presidentin Biden. Në një reagim, ky i fundit e cilësoi një vendim të drejtë atë të Cuomos, ndërsa vlerësoi punën e tij si guvernator. “Ka bërë një punë shumë të mirë, nga qasja në votim tek infrastruktura e shumë çështje të tjera. Prandaj është e trishtë”, deklaroi presidenti i Shteteve të Bashkuara. Andrew Cuomo është guvernatori i tretë i Nju Jorkut që lë detyrën nën tymnajën e skandaleve. Një hetim i pavarur nga prokurorja e përgjithshme e Nju Jorkut, Letitia James, zbuloi se 63-vjeçari kishte shantazhuar seksualisht 11 gra, përfshirë punonjëse të administratës. Gratë pretendojnë se ai kishte bërë komente seksuale, i kishte prekur në mënyrë të papërshtatshme, dhe puthur pa lejen e tyre. Përfundimet e hetimit i dhanë shtysë përpjekjeve të demokratëve për të nisur procedurat e “impeachment”. Vendin e Cuomos do ta marrë zëvendësguvernatorja Kathy Hochul, e cila bëhet gruaja e parë që do të drejtojë Nju Jorkun.