Agron Bajrami, ambasadori i Kosovës në Bruksel, ka reaguar pas deklaratës së homologut të Shteteve të Bashkuara të Amerikës në Beograd, Christopher Hill, se Serbisë nuk do t’i kërkohet njohja e pavarësisë së Kosovës për t’u bërë anëtare e Bashkimit Evropian. Në një postim në rrjetin social X, ambasadori Bajrami shkruan se qëllimi i Dialogut të Brukselit të udhëhequr nga BE është të arrihet normalizimi i plotë i marrëdhënieve ndërmjet Kosovës dhe Serbisë. Ai shton më tej, se pa njohje reciproke, nuk mund të ketë normalizim. Më herët, edhe Gjermania ka bërë me dije se qëndron në të njëjtën linjë, se është e paimagjinueshme që dy vende që nuk e njohin njëra-tjetrën të bëhen anëtare të Bashkimit Evropian. Rruga drejt BE-së për Kosovën dhe Serbinë, vijon pas zbatimit të plotë të marrëveshjeve të Ohrit dhe Brukselit prej të dy palëve.