Një incident i paplanifikuar shoqëroi mbrëmjen e së martës festivalin e muzikës italiane të Sanremos. Këngëtari Blanco, në mes të performancës së tij ka shpërthyer ndaj dekorit të skenës, ku viktima ishin disa vazo me lule. Ai i ka shkelmuar me tërbim, duke i hedhur e thyer ato. Gjesti shkaktoi reagimin e publikut në sallë, që me fërshëllima e kundërshti e qortoi për këtë veprim. Ai që u mundua ta kalojë me batutë gjithë situatën e sikletshme ishte Amadeusi. “Ke bërë rrëmujë”, i tha ai, i cili u përpoq të qetësonte situatën mes këngëtarit dhe publikut që protestonte. Këngëtari u justifikua me një defekt teknik në kufje. Por, justifikimi nuk e bindi publikun dhe oferta për ta kënduar edhe njëherë këngën ‘L’isola delle rose’ u refuzua. Kjo është hera e dytë që Blanco merr pjesë në San Remo. Vitin e kaluar ai fitoi me këngën ‘Chills’ në bashkëpunim me Mahmood.