Zëvendëskryeministri i Qeverisë së Serbisë, Aleksandar Vulin, është takuar të mërkurën me drejtorin e Shërbimit të Jashtëm të Inteligjencës, të Rusisë, Sergey Naryshkin. Vulin dhe Naryshkin kanë diskutuar për përmirësimin dhe forcimin e bashkëpunimit mes strukturave të sigurisë të Serbisë dhe Rusisë, tha Qeveria e Serbisë. Sipas deklaratës së qeverisë, Naryshkin vlerësoi "përpjekjet e zëvendëskryeministrit serb Vulin, i cili, duke kryer funksionet e ministrit të Mbrojtjes, të Punëve të Brendshme dhe drejtorit të Agjencisë për Siguri dhe Informacion (BIA), ka ndikuar në zhvillimin e marrëdhënieve të mira mes shërbimeve serbe dhe ruse." Vulin, në anën tjetër, ka falënderuar shefin rus të spiunazhit për "partneritetin e besueshëm dhe gjithmonë të sigurt, si edhe për mbështetjen ndaj Serbisë”. Përveç takimit me Naryshkin, Vulin pritet të takohet edhe me zyrtarë të tjerë rusë, dhe do të marrë pjesë në një pritje të Ambasadës së Serbisë me rastin e 80-vjetorit të çlirimit të Beogradit nga pushtimi gjerman gjatë Luftës së Dytë Botërore. Vulin konsiderohet si një nga mbështetësit më të mëdhenj të Kremlinit në lidershipin serb. Ai u takua edhe me presidentin rus, Vladimir Putin, në margjinat e Forumit Ekonomik Lindor në Vladivostok, kur deklaroi se Serbia nuk është vetëm partnere strategjike, por edhe aleate e Rusisë. Në janar të këtij viti, Vulin u nderua nga presidenti i Rusisë dhe Shërbimi Federal i Sigurisë së Rusisë. Vulin është në listën e zezë të Departamentit amerikan të Shtetit, për lidhjet e tij me Rusinë dhe përfshirje në korrupsion gjatë kohës kur ishte në krye të BIA-s.