Albin Kurti ka sfiduar vendimin e Gjykatës Themelore të Prishtinës dhe as këtë të martë nuk është paraqitur në prokurorinë speciale për të dëshmuar në lidhje me hetimet për tenderat sekretë. Sipas vendimit të gjykatës, Albin Kurti duhej të paraqitej në orën 10:00 të së martës për t’u marrë në pyetje nga prokurorët. Por, në këtë orar, Kryeministri i Kosovës ka qenë duke udhëtuar drejt Gjilanit, ku më vonë u shfaq duke marrë pjesë në nisjen e punimeve për ndërtimin e një çerdhje. Kurti ka refuzuar edhe më herët ftesat e Prokurorisë Speciale për t’u paraqitur dhe për të dëshmuar në lidhej me hetimet që kjo prokurori ka nisur për tenderin e rezervave shtetërore. Javën e kaluar, ai iu përgjigj prokurorëve përmes zyrës së shtypit, duke u thënë se nuk kundërshtonte dëshminë, por ftonte prokurorët që të merrnin rrëfimin e tij te godina e Kryeministrisë.