Reshjet e pandërprera të shiut që nga pasditja e 14 shkurtit dhe gjatë gjithë natës kanë ndikuar në rritjen e niveleve të disa lumenjve në Kosovë, duke shtuar rrezikun për përmbytje lokale. Sipas Institutit Hidrometeorologjik të Kosovës, rritje të theksuar të nivelit kanë shënuar lumenjtë në Pellgun e Lepencit dhe në atë të Moravës së Binçës. Aktualisht, lumi Lepenc në pikën matëse në Han të Elezit ka arritur nivelin 2.93 metra dhe është ende në rritje. Ndërsa morave në Viti ka arritur në 1.33 metra dhe vazhdon të rritet po ashtu. Ndërkohë, sipas institutit, lumenjtë e tjerë në vend janë brenda rrjedhave normale dhe aktualisht nuk paraqesin rrezik për përmbytje. Zyrtarët thanë se është regjistruar një sasi e madhe reshjesh shiu, me brezovicën që ka regjistruar 24.8 mm shi dhe hanin e elezit 36.8 mm. Autoritetet u bëjnë thirrje qytetarëve, veçanërisht atyre që jetojnë pranë lumenjve, të tregojnë kujdes për shkak të mundësisë së përmbytjeve lokale.