Forcat e policisë kanë ndërmarrë një aksion të gjerë në fshatrat e Krujës me pjesëmarrjen e efeketivëve të RENEA-s, Forcave të Ndërhyrjes së Shpejtë të disa qyteteve. Operacioni është përqendruar në fshatin Nikël, një nga zonat e njohura për kultivimin e kanabisit në vite. Burime për Top News bëjnë me dije se nga operacioni i ndërmarrë deri më tani janë shoqëruar 10 persona. Aktualisht po ushtrohen kontrolle në terren, në sera dhe magazina, ndërsa raportohet se janë sekuestruar kubikë dhe fidanë kanabisi. Në krye të operacionit ka qenë vet Drejtori i Përgjithshëm i Policisë së Shtetit, Ardi Veliu, Drejtori i Departamentit të Policisë Kriminale, Tonin Vocaj dhe Drejtori i Departamentit të Sigurisë Publike, Gjovalin Loka. Tashmë trafikantët shqiptarë duket se kanë ndryshuar strategji, pasi nga mbjellja e kanabisit në parcela të hapura, po kultivojnë drogë brenda në shtëpi. Deri tani raportohet se është zbuluar se në bodrumin e një vile ishte ngritur një serë droge. Trafikantët kanë ndërtuar një shtëpi bari, një model që aplikohet kryesisht në Britani të Madhe. Bimët në lartësi rreth 2 metër janë të mbuluar me plastmas për ti shpëtuar të ftohtit, por edhe policisë.