Policia e Shtetit thotë se asnjë efektiv i saj që u vu përballë deputetëve të Partisë Demokratike në oborrin e Kuvendit nuk ishte i armatosur. Sipas policisë, efektivët, në bazë të ligjit për tubimet kanë dalë në terren me mjetet mbrojtëse antiprotestë, por jo me armë zjarri. Më pas, me zhvendosjen e protestës para Kuvendit edhe efektivët u zhvendosën bashkë me mbështetësit e opozitës. Shërbimet e Policisë, thuhet në deklaratë, konform ligjit, kanë marrë masa për të garantuar sigurinë e institucioneve shtetërore ne rastin konkret te Kuvendit të Republikës së Shqipërisë për të parandaluar një sulm të mundshëm nga protestuesit ndaj këtij institucioni. Bazuar në ligjin “Për tubimet”, punonjësit e Policisë, vijon njoftimi, të angazhuar për mbarëvajtjen e tubimit, nuk kanë qenë të pajisur me armë zjarri gjatë tubimit, po vetëm me mjete mbrojtëse dhe me shkopinj gome.