Prokuroria Speciale e Kosovës njoftoi të mërkurën se ka ngritur aktakuzë ndaj 45 personave, përfshirë Millan Radoiçiçin, për sulmin e armatosur në Banjskë. Kryeprokurori Blerim Isufaj, tha se për 45 të pandehurit ekziston dyshimi se kanë kryer vepra penale që lidhen me terrorzimin. Ai shtoi se ekzaminimet që janë bërë jashtë vendit, kanë ndikuar në vonesat për ngritjen e kësaj aktakuze. Në anën tjetër, prokurori Naim Abazi tha se hetimet për këtë rast kanë qenë ndër më komplekset dhe se falë bashkëpunimit ndërkombëtar me SHBA-në, shtete të BE-së dhe të tjera, prokuroria ka arritur të sigurojë "prova që ndihmuan në ngritjen e kësaj aktakuze të fuqishme". Ai tha se gjatë procesit të hetimeve "janë sekuestruar dhe konfiskuar prona, automjete të blinduara, para të gatshme dhe llogari bankare, të cilat dyshohet se janë fituar nga aktivitete të paligjshme". Sipas tij, janë konfiskuar, po ashtu, mbi 1.266 armë dhe pajisje të tjera.