Gjashtë migrantë, përfshirë katër fëmijë, kanë vdekur nga etja në pjesën tuniziane të shkretëtirës të Saharës, pranë kufirit me Algjerinë. Migrantët vdiqën në mes të valës së të nxehtit që ka përfshirë Tunizinë dhe të gjithë rajonin e Mesdheut, tha Aymen Béjaoui për një stacion radio lokale. Në Tunizi temperaturat të mërkurën arritën një rekord të lartë prej 50 gradë Celsius, sipas shërbimit kombëtar të motit. Autoritetet tuniziane kanë thënë kohët e fundit se po shohin një rritje të migrantëve nga vendet afrikane që përpiqen të kalojnë kufirin nga Algjeria në Tunizi me qëllim të arritjes në Evropë përmes Detit Mesdhe. Javët e fundit, peshkatarët tunizianë dhe autoritetet detare kanë gjetur një mori trupash të migrantëve të mbytur dhe kanë shpëtuar qindra të tjerë, pasi anije të shumta u fundosën ndërsa përpiqeshin të arrinin në Evropë, raporton Washington Post.