Kompania “Massabi Fruits” me administrator shtetasit Erion Peti dhe Klajdi Xibraku, e cila kishte porositur kontejnerët me banane ku u gjet 143 kg lëndë narkotike e llojit kokainë, prej kohësh ishte vendosur në “listën e zezë”. Prokuroria kishte nisur një hetim ndaj kompanisë duke gjurmuar çdo ngarkesë të saj, pasi kishin nisur dyshimet se trafikonin kokainë. Hetimi kishte nisur që në kohën kur në vend funksiononte ende Prokuroria e Krimeve të Rënda, pra në vitin 2018, për të bërë në fund kapjen e pak ditëve më parë. Ishte një informacion operativ i mbërritur nga jashtë Shqipërisë, ai që sinjalizoi agjentët lidhur me “pakon” që po vinte brenda kamionit. Brenda lënda narkotike ishte e mbështjellë me një shtresë metalike alumini, e cila synonte ti bënte ato të padukshme për skanerat ndërkufitarë. Por mesa duket nuk ka funksionuar. Sipas ekspertëve, droga ishte e një cilësie të pastër, dhe pritej që të përpunohej në Shqipëri. Ndërkohë që hetimet vazhdojnë për të zbuluar persona të tjerë që mund të jenë të përfshirë në rrjetin e trafikimit. Të arrestuarit Erion Peti dhe Klajdi Xibraku kanë hapur kompaninë Masabi Fruits më 20 prill 2018, ndërkohë që një ditë më vonë është regjistruar edhe subjekti Exoalmax me pronar Selim Çekaj, të cilit gjithashtu në konteinierët me banane iu gjetën 49 kg kokainë. Selim Çekaj është babai i biznesmenit Arbër Çekaj, pronar i kompanisë tjetër “Arbri Garden”, e cila solli në Shqipëri në shkurtin e vitit 2018 nga Ekuadori 613 kg kokainë.