19 raste covid janë regjistruar në Kosovë nga data 10 deri më 23 korrik sipas të dhënave të bëra publike nga ana e autoriteteve shëndetësore. Përmes një njoftimi Instituti Kombëtar i Shëndetësisë Publike të Kosovës rekomandoi për qytetarët që t’I kushtojnë rëndësi higjenës, të qëndrojnë në ajër të pastër, të kryejnë teste për kornavirus nëse kanë shqetësime dhe të ruajnë distancën. Rastet i takojnë grup-moshave nga 0-9 deri 70-79 vjeç, ku grupmosha 30-39 vjeç kishte 4 raste, si grupmosha më e prekur. Raste me koronavirus – që për herë të parë u shfaq në Vuhan të Kinës në fundin e vitit 2019 – së fundi janë regjistruar në vende të ndryshme të botës dhe në kontinentin evropian. Në janar të këtij viti, revista shkencore Lancet publikoi një studim rreth pandemisë së koronavirusit. Sipas gjetjeve të studimit pandemia ndikoi në jetëgjatësinë e njerëzve, pasi gjatë periudhës së pandemisë jetëgjatësia ra për 1.6 vjet. Hulumtuesit po ashtu vlerësuan se COVID-i ka shkaktuar 15.9 milionë vdekje gjatë viteve 2020-2021.