Një vajzë, 11 ose 12 vjeçare, ka qëlluar me armë zjarri dy nxënës dhe nje pjesëtar të stafit në një shkollë të shtetit të Idahos në Shtetet e Bashkuara. Vajza, emri I së cilës nuk bëhet I ditur, është nxënese e klasës së gjashtë në shkollën e mesme të qytetit të Rigbit. Ajo kishte marrë me vete një pistoletë me të cilën hapi zjarr. Tre viktimat thuhet se janë jashtë rrezikut për jetën. Njëra nga mësueset arriti ta çarmatosë vajzën dhe e mbajti nën kontroll deri sa arriti policia. Motivi I incidentit nuk dihet ende. Sipas sherifit të Jefferson County, Steve Anderson, “Vajza nxori një pistoletë nga çanta dhe qëlloi disa herë brenda dhe jashtë shkollës”. Ai shtoi se vajza është nga qyteti fqinj I Idaho Falls. Incidenti po hetohet nga FBI dhe policia locale. Një nxënës 12 vjeçar, tha për Associated Press se në fillim dëgjuan “një zhurme të fortë, e pastaj edhe dy të tjera. Pastaj dëgjuam britma. Mësuesi ynë shkoi të kontrollonte dhe pa njolla gjaku.” – shtoi ai. Dr. Michael Lemon, drejtor I Spitalit të Traumës, tha në një konferencë për shtyp, se nxënësit e plagosur janë akoma në spital, dhe njëri prej tyre mund të ketë nevojë per ndërhyrje. Një nga viktimat është plagosur në dy gjymtyrë. Ndërsa pjesëtari I stafit kishte marrë trajtimin e nevojshëm dhe ishte kthyer në shtëpi. Ai shtoi se prej kohësh, shkollat e mesme kishin bërë stervitje në bashkëpunim, duke simuluar incidente të tilla. Sipas tij, po të mos ishin bërë këto stërvitje, bilanci mund të ishte shumë më tragjik. Siç njoftohet, të premten shkollat do të jenë të mbyllura dhe për nxënësit do të vihen në dispozicion psikologë. Presidenti Biden njoftoi së fundmi masat që do të marrë për të shtuar kontrollin e armëve të zjarrit, si pasojë e disa incidenteve të kohëve të fundit. Muajin e shkuar, presidenti Biden e quajti nivelin e dhunës me armë zjarri në SHBA, një “siklet ndërkombëtar”