Shtetet e Bashkuara po shqyrtojnë një reduktim të ndjeshëm të kontributit të tyre ushtarak në NATO, në një lëvizje që mund të riformatojë arkitekturën e sigurisë në Europë. Sipas revistës gjermane “Der Spiegel”, Uashingtoni synon të pakësojë ndjeshëm praninë e forcave ajrore dhe kapaciteteve të avancuara ushtarake të vendosura në kuadër të Aleancës. Raporti, që i referohet një takimi të zhvilluar në fundjavën e kaluar mes përfaqësuesit të Pentagonit dhe zyrtarëve të lartë të NATO-s në selinë e Aleancës, thotë se plani parashikon ulje të konsiderueshme të bombarduesve strategjikë si dhe reduktim me rreth një të tretën të avionëve luftarakë amerikanë. Po ashtu, SHBA nuk do të furnizojë më në të njëjtën masë nëndetëse dhe dronë zbulues, ndërsa përdorimi i dronëve të armatosur pritet të reduktohet ndjeshëm.