Gjkykata e Elbasanit vendosi të mbyll në qeli 2 nga të tre të arrestuarit që kërcënuan me jetë biznesmenin nga Cërriku, Eral Myftaraj që ky I fundit të tërhiqej nga një tender me vlerë afro 1 mln euro që kishte fituar. Trupi gjykues dha masën e sigurisë “arrest me burg” për 37-veçarin Edmir Boci dhe 27-vjeçarin Algert Alcani. Ndërkohë për 62-vjeçarin Shaqir Alcanin caktoi “arrest shtëpie”. Tre të ndaluarit u shfaqën të qetë brenda kafazit të sigurisë. Ndërsa gjyqi vijoi më pas me dyer të mbyllura. Ndaj tyre rëndon vepra penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim. Akuzë kjo që parashikon 2-8 vite burg. Sipas organit të akuzës Shaqir dhe Algert Alcani, babë e bir, kishin pajtuar 37-vjeçarin Edmir Boci dhe një 38-vjeçar që vijon të jetë në kërkim; për të kanosur e shantazhuar administratorin e Meteo SHPK që të tërhiqej nga tenderi për ngrohje që kishte fituar në Bashkinë e Tiranës. Nga hetimet rezultoi se të akuzuarit I kishin vendosur pistoletën në kokë biznesmenit Eral Myftaraj me qëllim që ky I fundit të mos vazhdonte procedurat ose në të kundërt do t’i vrisnin djalin.