Ylli kolumbian i pop-it, Shakira, ka elektrizuar mbi 2 milionë njerëz në plazhin legjendar të Copacabana Beach, në një koncert madhështor nën dritën e hënës së plotë. E veshur me ngjyrat e Brazilit, artistja 49-vjeçare doli në skenë pas orës 23:00, ndërsa qielli u ndriçua nga dronë. Në një mesazh në portugalisht, ajo i tha turmës: “Brazil, të dua! Është magjike të jemi miliona shpirtra bashkë për të kënduar dhe për t’i kujtuar botës çfarë ka rëndësi.” Koncerti, i zhvilluar përballë hotelit ikonë Copacabana, përfshiu hitet më të njohura, ndërsa spektakli u shoqërua me 10 ndërrime kostumesh dhe një skenë gjigante mbi 1,300 metra katrorë. Në skenë iu bashkuan edhe emra të mëdhenj të muzikës braziliane, duke e kthyer koncertin në një festë të kulturës latino-amerikane. Kryebashkiaku i Rio-s, e cilësoi eventin historik, ndërsa theksoi se “2 milionë njerëz dëshmuan një moment unik për qytetin”. Përmasat e spektaklit u shoqëruan me masa të forta sigurie, ku rreth 8 mijë efektivë u angazhuan në terren, së bashku me kamera me njohje fytyre dhe kontrolle të shumta për hyrjen në zonë. Koncerti i Shakirës shënon një tjetër rekord për Copacabana-n, pas performancave të Madonna dhe Lady Gaga në vitet e fundit, duke konfirmuar plazhin si një nga skenat më të mëdha të muzikës live në botë. Autoritetet lokale vlerësojnë se eventi do të gjenerojë mbi 160 milionë dollarë për ekonominë e qytetit, ndërsa rezervimet ajrore janë rritur ndjeshëm krahasuar me një vit më parë. Turneu i saj i fundit, “Women No Longer Cry”, jo vetëm që ka nisur me sukses në Rio, por ka hyrë edhe në historinë e industrisë muzikore si një nga më fitimprurësit për një artiste latine.